राजकुमार योगी
सुर्खेत, १६ पौष । नेपाल कम्युनिष्ट पार्टी भेरी-कर्णाली ब्युरोले सुर्खेतमा कुनै दोहोरो फायरिङ नभएको स्पष्ट पारेको छ ।
सरकारी समाचार संस्था राससको समाचारलाई उदृत गर्दै विभिन्न संचारमाध्यममा विप्लव नेतृत्वको नेकपा र प्रहरीबीच सुर्खेतको पञ्चपुरी नगरपालिका -८ मा दोहोरो फायरिङ भन्ने समाचार अाएपछि भेरी-कर्णाली ब्युरोले खण्डन गरेको हो ।
नेकपाले सिभिलमा पुगेका प्रहरीले आफ्ना नेता बज्र बहादुर शाहीको घरमा आकस्मिक खानतलासी गरेर उहाँलाई पक्राउ गर्न खोज्दा जनताबाट प्रतिकार भएको र त्यसै क्रममा प्रहरीले फायर गरेको बताएको छ ।
नेकपा भेरी कर्णाली ब्युरोले निकालेको विज्ञप्तिमा घटनालाई फासीवादी दमनको पराकाष्ठा भनेको छ ।
सरकारी समाचार संस्था राससको समाचार यस्तो थियो-
सुर्खेत । सुर्खेतको पञ्चपुरी नगरपालिका–८ स्थित चेनेरीताल जङ्गलमा प्रतिबन्धित नेत्रविक्रम चन्द विप्लव समूहका कार्यकर्ता र प्रहरीबीच दोहोरो फायरिङ भएको छ ।
विप्लव समूहका नेता बज्रबहादुर शाहीलाई पक्राउ गर्न गएको प्रहरी टोलीमाथि बुधबार दिउँसो तीन राउण्ड फायर गरेपछि प्रहरीले पनि जवाफी फायरिङ गरेको थियो ।
जिल्ला प्रहरी कार्यालयका प्रमुख एवं प्रहरी उपरीक्षक दिल्लीराज पन्तले विप्लव समूह र प्रहरीबीच दोहोरो फायरिङ भएको पुष्टि गरे ।
विप्लव समूहका जिल्ला नेता शाही घरमा आएको सूचनाका आधारमा प्रहरी उनलाई पक्राउ गर्न गएको थियो ।
प्रहरी उपरीक्षक पन्तले शाहीको घरमा नपुग्दै जङ्गलमा प्रहरीमाथि आक्रमणको प्रयास गरेको बताए ।
शाहीलाई पक्राउ गर्न इलाका प्रहरी कार्यालय बाबियाचौरबाट पेस्तोलसहित दुई जना प्रहरी सादा पोशाकमा खटाइएको थियो ।
“प्रहरीलाई देख्न वित्तिकै ८–१० जनाको सङ्ख्यामा रहेका विप्लवका कार्यकर्ताले फायरिङ गरे, हाम्रो तर्फबाट दुई जनामात्रै भएकाले पक्राउ गर्न सकेनौं,” इलाका प्रहरी कार्यालय बाबियाचौरका प्रमुख ज्ञानबहादुर खत्रीले भने,“अहिले थप प्रहरी परिचालन गरेर जङ्गल क्षेत्रमा उनीहरुको खोजी भइरहेको छ ।”
यसैबीच, विप्लव समूहले हिजोराति सुर्खेतका विभिन्न स्थानमा रहेको एनसेल टावरमा बम राखेको थियो ।
भेरीगङ्गा नगरपालिकाको एनसेल टावरमा आगजनी गर्नुका साथै वीरेन्द्रनगर पिपिरास्थित एनसेल टावर नजिक बम राखेको थियो । उक्त बम आज बिहान नेपाली सेनाले निष्क्रिय पारेको थियो ।
