अनखबर धनकुटा, माघ ६ । विप्लव नेतृत्वको नेपाल कम्युनिष्ट पार्टीले जिल्लामा सञ्चालित गैरसरकारी संस्था (एनजीओ) र अन्तर्राष्ट्रिय गैरसरकारी संस्था (आइएनजीओ)लाई घरभाडामा नदिन उर्दी जारी गरेको छ।

आइतबार एक विज्ञप्ति जारी गर्दै नेपाल कम्युनिष्ट पार्टी धनकुटाले जिल्लामा सञ्चालनमा रहेका गैर सरकारी संस्था (एनजीओ) र अन्तर्राष्ट्रिय गैर सरकारी संस्था (आइएनजीओ) लाई दिएको घर खाली गराउन भनेको छ ।

पार्टीका धनकुटा जिल्ला इन्चार्ज दर्शन किराँती र सचिव सुदर्शन थापाद्वारा हस्ताक्षरित विज्ञप्तिमा भनिएको छ ‘एनजीओ र आइएनजीओले देशमा आर्थिक रुपमा शुन्य बनाउँदै लगेको छ, यस्ता संस्थाहरुलाई सामाजिक दलाल, पुँजीवादी सरकारले कारबाही गर्नुको साटो संरक्षण गर्दै खुलेआम जनतालाई लुट्न दिइरहेको छ, त्यसैले गर्दा राष्ट्रलाई आर्थिक संकटबाट बचाउन तपाइको पनि दायित्व हो, त्यस्ता दलाल पुँजीवादी संस्थाको कार्यालय हटाइदिनु हुन अनुरोध गर्दछौं ।‘

यस्ता संस्थाहरुले देशैभरि जनताको इच्छा विपरित ढाँटछल गरि जनतालाई दुखी बनाइ आफ्नो स्वार्थ पुरा गरिरहेको हुँदा उक्त संस्थाहरुलाई बन्द गर्ने पार्टीको अभियान रहेको जारी विज्ञप्तिमा उल्लेख छ ।

नेपाल कम्युनिष्ट पार्टीले यसअघि जिल्लामा सञ्चालन र कारोबार गरिरहेका वित्तीय तथा लघुवित्तीय संघ–संस्थाको कारोवार बन्द गर्न जेठ २४ गते धम्की दिएको थियो। पार्टीनिकट लिम्बूवान स्वायत्त जिल्ला जनपरिषद्ले जेठ २४ गते विज्ञप्ति जारी गर्दै जिल्लामा सञ्चालनमा रहेका संघ संस्थाका गतिविधि बन्द गर्न यस्तो धम्की दिएको थियो।