बिराटनगर पुगेर विप्लवले भने ३ बुदे सहमति लागु नगरिए विद्रोह गरिन्छ

अनखबर संवाददाता

बिराटनगर, नेपाल कम्युनिस्ट पार्टीका महासचिव नेत्रविक्रम चन्द विप्लवले ३ बुदे सहमति नगरिए विद्रोह गर्ने चेतावनी दिएका छन् । सो पार्टी द्वारा प्रदेश -१ काे राजधानी बिराटनगरमा आयोजित सभालाई सम्बोधन गर्दै विप्लवले यस्तो चेतावनी दिएका हुन । विप्लवले एकीकृत जनक्रान्तिको अभियानमा पुर्वकाे ठुलाे योगदान रहेको चर्चा गर्दै पुर्वबाट क्रान्तिकाे ज्वाला निस्किने उद्घोष समेत गरे । बिराटनगरबाट भएको मजदुर आन्दोलन र झापाबाट शुरू भएको सामन्तका टाउकाे काट्ने अभियान स्मरण गर्दै विप्लवले आज तिनै व्यक्ति र तिनका पार्टी सामन्तीको अगुवा बन्न पुगेकाले देश र जनताले दु:ख पाएको टिप्पणी गरे । एकीकृत जनक्रान्ति र वैज्ञानिक समाजवाद असम्भव भन्दै हिँड्ने केपी , प्रचण्ड , बाबुराम , शेरबहादुरहरू नै अहिले यो व्यवस्थाबाट आजित भैसकेको बताउँदै महासचिव विप्लवले राणा शासनको अन्त्य , झापा अान्दोलन , पञ्चायती व्यवस्था बिरूद्वकाे आन्दोलन , सामन्तवाद विरूद्वकाे दशवर्षे जनयुद्ध परिवर्तन चाहने जनताबाट भएकोले जनताले दलाल पुजीवादी संसदीय व्यवस्थाकाे अन्त्य गरेर बैज्ञानिक समाजवादी व्यवस्था ल्याएरै छाड्ने र अहिलेकाे परिस्थितिमा यो मात्रै विकल्प रहेको समेत बताए ।